Streeksnuus Maandag 02/11/2026
# Nog drie verdagtes vasgetrek in Ventersdorp plaasaanval
# Bekende Hartbeespoort-radio-omroeper oorlede
# Boeregemeenskap help om drie bankroofsverdagtes vas te trek

# Die polisie het nog drie verdagtes in hegtenis geneem in verband met die wrede aanval op ’n boer op Syferfontein, buite Ventersdorp. Dit bring die getal verdagtes wat tot dusver vasgetrek is op vyf te staan. Die jongste arrestasies is gister in Promosa, naby Potchefstroom, gemaak. Die polisie het ook beslag gelê op vier vuurwapens, waarvan twee met die voorval verbind word, asook klere en juweliersware. Die 50-jarige boer is verlede Woensdag geskiet en wreed aangerand, insluitend sy ore wat afgesny is. Die vyf verdagtes, tussen 26 en 56 jaar oud, sal vandag in die Ventersdorp- en Potchefstroom-landdroshowe verskyn op aanklagte van huisroof, poging tot moord en die onwettige besit van vuurwapens en ammunisie.

# Die Hartbeespoort-gemeenskap is in rou ná die skielike afsterwe van die bekende inwoner en omroeper Hein van Wyk. Hy is Saterdag onverwags op die ouderdom van 63 jaar oorlede. Hein het meer as 30 jaar lank in die radiobedryf gewerk en was elke middag tussen vier- en sewe op die radio te hoor met sy Huiswaarts program. Sy radio stasie het hulde aan hom gebring en hom beskryf as ’n radiolegende met ’n besondere liefde vir die medium en ’n unieke teenwoordigheid agter die mikrofoon. Die stasie sê hoewel Hein se mikrofoon nou stil is, sal sy nalatenskap en bydrae tot radio voortleef.

# Drie verdagtes is ná ’n gewapende bankroof in Sannieshof aangekeer, met die hulp van die plaaslike boeregemeenskap. Die roof het Vrydagoggend plaasgevind toe drie gewapende mans die bank binnegegaan het. Die bestuurder is met ’n vuurwapen gedreig en gedwing om geld in sakke te pak, waarna die verdagtes gevlug het. Die polisie het met behulp van veiligheidskameras en inligting van die “Sannieshof Farmer’s Community in Blue” daarin geslaag om die verdagtes op die Ottosdal-pad op te spoor en vas te trek. Een van die sakke wat tydens die roof gebruik is, asook van die verdagtes se klere, is teruggevind. Die voertuig waarmee hulle aanvanklik gevlug het, is later verlate in Sannieshof gevind. Die drie verdagtes, tussen 47 en 49 jaar oud, sal na verwagting vandag in die Delareyville-landdroshof verskyn. Luitenant-generaal Arthur Adams, provinsiale polisiekommissaris, het die boeregemeenskap bedank vir hul vinnige optrede en belangrike bydrae tot die arrestasies.

# en ten slotte…Die Verkiesingskommissie het weer bevestig hy is gereed vir die plaaslikeregeringsverkiesing, met meer as 2,6-miljoen kiesers wat vandag en môre hul spesiale stemme sal gebruik. Altesaam 80-persent van die goedgekeurde huisbesoeke is vir kiesers ouer as 60, terwyl vroue verantwoordelik is vir 74-persent van die goedgekeurde spesiale stemme. Die OVK se uitvoerende hoof, Sy Mamabolo, sê die spesiale stemproses is vir bejaardes, mense wat sieklik is en die met gestremdhede, asook kiesers wat nie op verkiesingsdag by hul geregistreerde stempunte kan stem nie.